Մեր խմբագրությունը բազմաթիվ ահազանգներ է ստանում այն մասին,, որ Եղբայրության եվ Շեվչենկո փողոցների հատող հատվածում տեղակայված համայնքային ոստիկանության Շենգավիթի հենակետի ոստիկանը չարաշահելով իր լիազորությունները, տևական ժամանակ գիշերները հանգիստ չի տալիս տեղի բնակիչներին:
Պարզվում է, հասարակական կարգը պահպանելու գործին ծառայող ոստիկանն ինքն է ամեն օր խախտում հասարակական կարգը։ Բնակիչները մեզ պատմեցին, որ ոստիկանը,որի անունը Վարդան է, բարձր երաժշտության ներքո, գրեթե ամեն օր գարեջրի համտեսման երեկո է կազմակերպում:
Լուսնակարում ոստիկան Վարդանն է
Վարդանի «ծառայությունն» այսքանով չի սահմանափակվում։ Նախօրեին նա բակում ահավոր տուրուդմփոց է սարքել, ընդորում՝ կեսգիշերին:Մերօրյա « Շերլոկ Հոմսը»,պարզվում է, հանցագործ էր «բռնում»։ Ի դեպ, «օպերացիան» իրականացնելիս ոստիկանը ոչ թե համազգեստով է եղել, այլ՝ «շորտիկով»։ Իսկ թե ինչ պատիժ է կիրառել նա ենթադրյալ հանցագործի նկատմամբ, թաղամասի բնակիչները միայն ենթադրում են, քանի որ ոստիկանը որոշել է հաշվեհարդարը հենց հենակետում կազմակերպել և բնակիչներին միայն աղմուկի ձայնն է հասանելի եղել:
Բնակիչների խոսքով՝ հենակետը ընդհանրապես ըստ նշանակության չի աշխատում․հերթափոխեր գրեթե չկան: Տարածքի «տեր ու տիրակալը» հատկապես գիշերային ժամերին Վարդանն է, նա նաև վերոնշյալ տարածքի բնակիչ է։ Ի դեպ, ամենակարող ոստիկանը գտել է շանտաժի միջոցով բնակիչներին լռեցնելու ձևը՝պարբերաբար բնակիչներին տեղեկացնում է, որ ինքն է այստեղ որոշումներ կայացնում, չմոռանալով հիշեցնել, թե իբր սուր աչք ունի, ամեն ինչ տեսնում է, բայց կան բաներ, որոնց վրա աչք է փակում։
Ահազանգող քաղաքացիները նշեցին նաև, որ սրանք ընդամենը պատառիկներ են ոստիկանի գործողություններից և պահվածքից։ Նրանք հույս հայտնեցին, որ խմբագրությունը հետևողական կլինի և իրենց խնդիրը քննության առարկա կդառնա նաև ոստիկանության բարձր ատյաններում: Իսկ մինչ այդ իրենք չեն հասկանում ոստիկանի հետ գործ ունեն, թե՞ քրեական հեղինակության: