Չորեքշաբթի նավթի գները նվազել են բարելի դիմաց 16 դոլարից ցածր՝ հասնելով 1999 թվականի նվազագույնին, շուկայի գերհագեցվածության եւ կորոնավիրուսի համավարակի տնտեսական հետեւանքների ֆոնին պահանջարկի անկման պատճառով, փոխանցում է Reuters-ը:
Հումքի պրոֆիցիտը սկսեց աճել այն բանից հետո, որբ ՕՊԵԿ+-ին՝ Սաուդյան Արաբիայի եւ Ռուսաստանի գլխավորությամբ մարտին չհաջողվեց երկարացնել արդյունահանման կրճատման մասին համաձայնագիրը: Ապրիլին համաձայնեցվեց նոր դաշնագիր, բայց համավարակի զսպման կարանտինային միջոցառումները հանգեցրին վառելիքի պահանջարկի կտրուկ կրճատման:
Brent տեսակի նավթի ֆյուչերսները, որ նախորդ նստաշրջանում 24 տոկոսով անկում էին ունեցել, հասել են բարելի դիմաց 15,98 դոլար նիշին, որը 1999 թվականի հունիսից նվազագույնն է: Brent-ը 13:10-ին վաճառվել է 18,93 դոլար նիշով: WTI-ի ֆյուչերսների անկումը կազմել է 3,4 տոկոս՝ հասնելով մինչեւ 11,18 դոլարի:
«Պատրաստ եղեք նավթի այս կոտրված շուկայում նոր անակնկալների»,- ասել է Rystad Energy-ից Բյորնար Թոնհաուգենը՝ հավելելով, որ գները կարող են նվազել մինչեւ աննախադեպ մակարդակների, որովհետեւ պահուստարաններն ուղղակի չեն բավականացնում, եթե արտադրության ծավալների հետագա նվազում չլինի:
ԱՄՆ-ում նավթի պաշարները ապրիլի 17-ին ավարտված մեկ շաբաթում աճել են 13,2 մլն բարելով, երեքշաբթի հայտնել էր Նավթի ամերիկյան ինստիտուտը: Վերլուծաբանները աճ էին կանխատեսել 13,1 մլն բարելով: