«Հրապարակ». Վարակվելու վտանգն անգամ չի թուլացնում պատգամավորների միջև մրցավազքը

««Իմ քայլի», «Լուսավոր Հայաստանի» և նույնիսկ ԲՀԿ-ական պատգամավորները խիստ վրդովված են ԲՀԿ-ական պատգամավորներ Սերգեյ Բագրատյանի և Միքայել Մելքումյանի՝ երեկ մեկնարկած խորհրդարանի նիստի ընթացքում դրսևորած պահվածքից:

Պատգամավորները կարծում են, որ նշված երկու գործընկերների մրցավազքի պատճառով այսօր մեկնարկած քառօրյա նիստը արհեստականորեն ձգձգվել է: Մինչդեռ նախապես իշխող թիմում ներքին որոշում էին ընդունել՝ իրավիճակով պայմանավորված հապշտապ ավարտել ԱԺ աշխատանքները, հատկապես, որ օրակարգում մեծամասամբ առաջինից երկրորդ ընթերցման ներկայացված նախագծեր են:

Սակայն մեզ ասացին, որ Սերգեյ Բագրատյանն ու Միքայել Մմելքումյանը տևական ժամանակ է իրար հետ մրցում են՝ parliamentmontoring-ի ամենաակտիվ պատգամավորի տիտղոսակիր դառնալու հարցում: Նրանց կուսակիցները կփաստեն, որ ցանկացած նախագծի ժամանակ երկուսից մեկը եթե գրանցվում է հարց տալու կամ ելույթ ունենալու համար, անմիջապես հետ չի մնում նաև երկրորդը:

Փաստորեն, անգամ այս վտանգավոր իրավիճակում պատգամավորները չեն պատրաստվում դադարեցնել մրցությունը: Մենք տեղեկացանք, որ «Իմ քայլից» անգամ նախատել են ԲՀԿ-ականներին՝ հորդորելով զսպել իրենց կուսակիցների ամբիցիաները:

Ընդ որում Մելքումյանի զգուշավորության մասին արդեն բոլորն են խոսում, նա այն բացառիկ պատգամավորներից է, ով ԱԺ նիստերին է հաճախում դիմակով և ձեռնոցներով, ավելին՝ նա կարող է այնքան սպասել դահլիճի դռան դիմաց, մինչև մեկ ուրիշը կգա և կբացի դուռը, միայն, թե ինքը չհպվի»,-գրում է թերթը:

Նյութն ամբողջությամբ կարդացեք թերթի այսօրվա համարում։