Նախ ասեմ, որ իմ որոշմամբ մարտ ամսին բարձրաստիճան պաշտոնյաները պարգևավճար չեն ստանալու, այդ գումարներն օգտագործվելու են կորոնավիրուսի դեմ պայքարի համար: Այս մասին ասաց Նիկոլ Փաշինյանը՝ ի պատասխան ֆեյսբուքյան օգտատիրոջ հարցին, թե անիմաստ պարգևավճարները չեն ցանկանում քչացնել, դրանք կարելի է փոխանցել թոշակառուներին։
«Եկեք դիտարկենք Ձեր առաջարկը: Դուք ասում եք, որ այն պարգևավճարները, որ իմ որոշմամբ հատկացվել են պաշտոնյաներին, այդ գումարը կարելի է հատկացնել թոշակառուներին: Եկեք հենց հիմա անենք կարևոր գործողություն. այդ նպատակի համար տարեկան օգտագործվում է 1 մլրդ դրամ, ի՞նչ տեղի կունենա, եթե մենք Ձեր առաջարկն իրականություն դարձնենք: Հայաստանում կա 503 հազար թոշակառու, եթե այդ 1 մլրդը հատկացնենք նրանց, տարեկան կտրվածքով թոշակառուին կհասնի 1988 դրամ, իսկ ամսվա դեպքում նրանց թոշակը ավելանա 165 դրամով: Փաստորեն Դուք շատ կարևոր բան եք համարում թոշակը 165 դրամով բարձրացնելը: Մենք մեր որոշմամբ արդեն իսկ 2020 թվականի հունվարի 1-ից ձեր ակնկալածից 24 անգամ ավելի բարձրացրել ենք թոշակները»,- շեշտեց նա:
Վարչապետը նշեց, որ պաշտոնյաների պարգևավճարների հարցը լուծելով՝ լուծել են կարևոր խնդիր՝ կարողացել են 2019 թվականի ընթացքում աննախադեպ բարձր տնտեսական ցուցանիշներ ապահովել, որի արդյունքներով 2018-ից մինչև հիմա 1 մլն 90 հազար մարդու աշխատավարձ, թոշակ ու նպաստ են բարձրացրել:
«Հասկանում եմ, որ պարգևավճարների թեման շահարկումների տեղիք է տալիս, բայց ես մի պարզ թվաբանական գործողությունով ցույց տվեցի, թե այդ շահարկման հետևում ինչ է գրված: Մենք պաշտոնյաների պարգևավճարների համար 2020-ին 1 մլրդ դրամ ենք հատկացրել, իսկ 2020 թվականի պետբյուջեով զինծառայողների, փրկարարների, անտառապահների ուսուցիչների աշխատավարձերի, նվազագույն աշխատավարձի, կենսաթոշակների և նպաստների բարձրացման համար հատկացրել ենք 71,6 մլրդ դրամ: Այսինքն այս գումարի 1.4 տոկոսի չափով ենք պաշտոնյանների հետ կապված խնդիր լուծել և այդ 1.4 տոկոսի ներդրման արդյունքում ունեցել ենք 98,6 տոկոսի էֆեկտ»,- հայտարարեց նա: