Հորդորում ենք, որ հարսանիք չանեն, չգիտեմ ինչ չանենք, տեսնում ենք, որ դա հորդորով չի ստացվում, հետևաբար, պետք է գործի հատուկ իրավական ռեժիմ, որ մարդիկ նաև դրա շրջանակում իրենց վարքը կարգավորեն և կազմակերպեն: Այս մասին խորհրդարանում լրագրողների հետ զրույցում ասաց ԱԺ ԼՀԿ խմբակցության պատգամավոր Էդմոն Մարուքյանը՝ անդրադառնալով երկրում հաստատված արտակարգ դրությանը:
«Արտակարգ դրության սահմանումը կկանխի վարակի ավելի շատ տարածումը և պետությանը՝ այս դեպքում պարետին և պարետային շտաբին հնարավորություն կտա իր գործողություններն ավելի օպերատիվ իրականացնել»,- ասաց նա:
Լրագրողները պատգամավորից հետաքրքրվեցին, թե ինչու չի պաշտպանվում ու դիմակ չի կրում, նա պատասխանեց, որովհետև գիտի՝ պետք է դիմակ կրել այն դեպքում, երբ կամ դու ես հիվանդ, կամ քո շրջապատից որևէ մեկն է հիվանդ:
Դիտարկմանն էլ՝ արտակարգ դրությունը ենթադրում է հանրաքվեն կամ չի կայանա կամ կհետաձգվի, Մարուքյանն ասաց. «Արտակարգ դրության ժամանակ ընտրություններ տեղի չեն ունենում, արգելվում է ընտրություն իրականացնել, ըստ այդմ, իշխանությունները կորոշեն ինչ անեն»:
Իսկ, թե արդյո՞ք ուշացած է համարում կառավարության կողմից արտակարգ դրություն սահմանելը, նա ասաց, որ բազմաթիվ հարցեր կան, որ պետք է քննարկել բացթողումների մասով, բայց չի կարծում, որ հիմա բացթողումներ քննարկելու ժամանակն է: «Հիմա միասնական գործելու ժամանակ է, ավելի լավ է ուշ, քան երբեք»,- ասաց նա:
Հիշեցնենք, որ այսօր կառավարությունն արտահերթ նիստով որոշում կայացրեց 2020թ․ մարտի 16-ը ժամը 18:30-ից մինչև ապրիլի 14-ը ժամը 9:00-ն երկրում սահմանվում է արտակարգ ռեժիմ: