Մարդկանց որոշակի հատված լուրջ չի վերաբվերում այս երևույթին, բայց այսօրվա մարդաշատության պատճառներից մեկը թոշակների ստանալու գործընթացն են, այս մասին Tert.am-ի հետ զրույցում ասաց Վանաձորի քաղաքապետ Մամիկոն Ասլանյանը՝ անդրադառնալով Վանաձորում մարդկանց կուտակումներին:
Նշենք, որ քաղաքապետն իր ֆեյսբուքյան էջում լուսանկար էր հրապարակել և գրել. «Վանաձորի մարդաշատ փողոցներով անհանգստացած բոլոր գործատուներին և ոչ միայն (ՊԵՏԱԿԱՆ,ՀԱՄԱՅՆՔԱՅԻՆ,ՄԱՍՆԱՎՈՐ) խնդրում եմ ՝ մտածենք, թե ինչպես անել, որպեսզի թոշակ կամ աշխատավարձ ստանալու համար քաղաքացիները ստիպված չլինեն իջնել քաղաք ու բանկոմատներից ստանալ իրենց հասանելիք՝ այս պահին կենսական անհրաժեշտ գումարները:Ոստիկանության բաժիններից մեկի պետի հետ զրույցից պարզվում է, որ այսօրվա շարժի հիմնական պատճառը թոշակ կամ աշխատավարձ ստանալն է»:
Դիտարկմանը, թե վարչապետ Նիկոլ Փաշինյանը ժողովրդին ուղղված իր ուղերձում նշել էր, որ այն թոշակառուները, ովքեր իրենց թոշակները կանխիկ են ստանում, այս ամիս կարիք չեն ունենա գնալ փոստային բաժանմունքներ և թոշակները կստանան առձեռն՝ իրենց բնակարաններում «Հայփոստի» շրջիկ խմբերի կողմից, Մամիկոն Ասլանյանն ասաց, որ հիմնականում նրանք են փողոց դուրս եկել, ովքեր անհրաժեշտություն ունեին իրենց բանկային քարտից գումարները կանխիկացնել:
«Մարդիկ կան որոնց թոշակները և աշխատավարձերը քարտի վրա են լինում, իսկ այն մարդիկ, ովքեր փոստային բաժանմունքից էին ստանում, նրանց առումով խնդիր չկա, տներում են ստանում»,-ասաց նա և նշեց, որ մարդկանց կուտակումները հենց գումարները կանխիկացնելու համար են բանկոմատների, բանկերի շուրջ:
«Ինչ-որ տեխնիկական լուծում պետք է ընտրվի, այդ մարդկանց կանխիկացված գումարները տները տարվեն, առավելևս ծերերի և խոցելի խմբերի համար»,- ասաց նա և նշեց, որ օնլայն ծառայությունները, օնլայն գնումներն ակտիվացել են: Չնայած դրան, նա նաև նկատեց, որ որոշակի առումով կա նաև անպատասխանատվություն, անլուրջ վերաբերմունք: