Վարչապետին ուղիղ ենթակա ոստիկանապետի աչքի առաջ քարուքանդ են անում ոստիկանության դիմադրությունը, մտնում են հիվանդանոց ու ոստիկանների աչքի առաջ մարդկանց են մորթում, իսկ Փաշինյանը մամուլի քարտուղարի բերանով հանրությանը փորձում է կերակրել ինչ-որ հնարված փայերի ու փայատերերի մասին կերակուրով։ Այս մասին ֆեյսբուքյան իր էջում գրել է իրավապաշտպան, «Հայրենիք» զարգացման հիմնադրամի գրասենյակի ղեկավար Արսեն Բաբայանը:
«Սա էլ հերիք չէ` վարչապետ Փաշինյանը փորձում է իր ստեղծագործություններում նշել Արթուր Վանեցյանի անունը։ Հասկանում եմ, որ ձեր իշխանության վախճանի հոտն արդեն քթներիդ տակ է, բայց դրա մեղավորը բացառապես դուք եք՝ ձեր ապաշնորհությամբ»,- գրել է Արսեն Բաբայանը։
Ավելի վաղ հայտնի էր դարձել, որ ապրիլի 28-ին Գավառում կրակոցներ են հնչել, որի հետևանքով 2 հոգի մահացել են, 2 հոգի մարմնական վնասվածքներով տեղափոխվել են Գավառի, 2 հոգի էլ Երևանի հիվանդանոցներ:
Գավառի ճանապարհին հնչած կրակոցներից հետո Նորատուսի բնակիչները չեն հանդարտվել: Վերջիններս երկաթյա ձողերով մտել են Գավառի հիվանդանոց, որտեղ հսկողություն են իրականացնում ոստիկանները։ Ձողերով և դանակներով զինվածներն սկսել են ջարդուփշուր անել հիվանդանոցի գույքը, որից հետո մուտք են գործել այն սենյակ, որտեղ պառկած են եղել կրակոցների արդյունքում վիրավորված երկու անձիք և դանակով կտրել են նրանց երկուսի պարանոցները: