ԱՄՆ նախագահի թեկնածու Ջո Բայդենը հայտարարել է, որ նախագահ ընտրվելու դեպքում չի չեղարկի երկրի գործող ղեկավար Դոնալդ Թրամփի` Իսրայելում ԱՄՆ դեսպանատունը Թել Ավիվից Երուսաղեմ տեղափոխելու որոշումը: Այս մասին գրում է «ՌԻԱ Նովոստի» գործակալությունը:
«Դա չպետք է տեղի ունենար այն համատեքստում, որում տեղի է ունեցել: Դա պետք է տեղի ունենա ավելի խոշոր համաձայնագրի համատեքստում, որպեսզի մեզ օգնի այդ գործընթացում խաղաղության հաստատման համար անհրաժեշտ կարևոր զիջումների հասնել: Բայց հիմա, երբ դա արդեն արվել է, ես դեսպանատունը հետ չէի տեղափոխի Թել Ավիվ»,-ասել է դեմոկրատ թեկնածուն:
Նա հավելել է, որ եթե նախագահ, դառնա, ապա Արևելյան Երուսաղեմում կբացի ամերիկյան հյուպատոսություն, որպեսզի իսրայելա-պաղեստինյան համակարտությունը երկու պետությունների սկզբունքի հիմքով կարգավորելու հեռանկարը պահպանվի:
Պաղեստինը Թրամփի՝ ԱՄՆ դեսպանատունը Թել Ավիվից Երուսաղեմ տեղափոխելուց հետո դե ֆակտո բարձր մակարդակով չի շփվում Միացյալ Նահանգների ղեկավարի աշխատակազմի հետ: Պաղեստինյան կողմը թերահավատորեն է մոտենում ԱՄՆ նախագահի՝ խաղաղությանն ուղղված քայլերին, կարծելով, որ այդ քայլերը կողմնակալ են ի օգուտ Իսրայելի: