Ամերիկացի միլիարդատեր, Tesla և SpaceX ընկերությունների հիմնադիր-ղեկավար Իլոն Մասկը հնարավոր է համարել, որ SpaceX ընկերությունը չի հասցնի մինչև իր մեռնելը կատարել իր հիմնական խնդիրը՝ տիեզերանավ ուղարկել դեպի Մարս մոլորակ, գրում է Bloomberg գործակալությունը:
«Եթե մենք չարագացնենք տեմպերը, ես հաստատ կմեռնեմ մինչև Մարս մեկնելը»,- նշել է 48-ամյա գործարարը՝ ելույթ ունենալով Վաշինգտոնում կայացած խորհրդաժողովում:
«Եթե մեզ 18 տարի պահանջվեց առաջին մարդկանց ուղեծիր ուղարկելու համար, ապա մենք պետք է արագացնենք նորարարական գործունեության տեմպերը, կամ էլ ես հաստատ կմեռնեմ միչև Մարս մեկնելը»,- հայտնել է Մասկը:
Ինչպես ավելի վաղ բազմիցս ընդգծել էր ամերիկացի գործարարը, նա հիմնել է SpaceX ընկերությունը՝ մարդկությանը Մարսի գաղութացման գործում օգնելու նպատակով: Հենց դրա համար էլ մշակվում է Starship տիեզերանավը՝ նախատեսված 100 մարդու համար։
Փետրվարի վերջին Starship SN1 նավի նախատիպը պայթել էր Տեխասի նահանգում փորձարկումների ժամանակ։
ՆԱՍԱ-ի ծրագրերի համաձայն՝ դեպի «կարմիր» մոլորակ առաջին թռիչքները պետք է սկսվեն 2030-ական թվականների կեսերին: