Լրագրող Գոհար Վեզիրյանն անդրադարձելէ ԱՄՆ նախագահի ընտրություններին

Լավագույն երազում անգամ չէի կարող պատկերացնել, որ ԱՄՆ-ի համար այս վճռորոշ փուլում ես կլինեմ Բերկլի համալսարանի քաղաքագիտության ֆակուլտետի ուսանող, որի նեղ մասնագիտացումը՝ ամերիկյան քաղաքականությունն է։ Այն, ինչ տեսնում, սովորում կամ զգացական մակարդակով ընկալում եմ ուլտրալիբերալիզմի այս խոշորագույն կենտրոնում, դժվար թե ինձ տրվեր այլ միջավայրում։ Բերկլիի՝ իմ այս շրջանին հուսամ կանդրադառնամ՝ 70-ից հետո, հուշագրություններիս տեսքով)։ 2024 թ․ ԱՄՆ ընտրությունները ամերիկյան քաղաքական եւ ակադեմիական շրջանակները որակում են պատմական կամ աննախադեպ (բառի ոչ նիկոլական, այլ իսկական իմաստով)։ Ինչո՞ւ՝ ամեն մեկն իր կարծիքն ունի։ Ընտրության կոնտեքստում՝ այս որակումների պատճառներից մեկը թեկնածուների հաղթելու 50/50% հավանականությունն է։ Երկուսի շանսերն էլ բառացիորեն հավասար են բոլոր համապետական հարցումների տվյալներով։ Նոյմեբրեի 1-ին մեկնարկել է նախագահական ընտրությունների վերջին փուլը՝ անհավանական լարված մրցավազքի վճռորոշ փուլը։ Երկու թեկնածուներն էլ մինչեւ նոյեմբերի 5-ը շարունակելու են իրենց քարոզարշավը․ հսկայական հանրահավաքներ, գրեթե 24-ժամյա ռեժիմով հարցազրույցներ ու աշխատանք ընտրազանգվածի բոլոր թիրախային խմբերի հետ։ Այս ընթացքում արդեն՝ միլիոնավոր մարդիկ քվեարկել են։ Վերջին հարցումները՝ նոյեմբերի 1-ի, 9։10pm տվյալներով հետեւյալն են․

FiveThirtyEight. Թրամփն այս պահին 8,1% տոկոսով առաջ է Օհայո նահանգում. Թրամփ 51.8%, Հարիս 43.7%։

Polymarket. Թրամփի հաղթելու շանսերը գնահատվում են 94%: Սա համաշխարհային կարևոր իրադարձությունների կանխատեսման առաջատար պլատֆորմ է։ Մյուս երկու բրիտանական խոշոր խաղադրույքներ ընդունող եւ կանխատեսումներ անող Sporting Index եւ Betfair Exchange պլատֆորմներում եւս Թրամփն է առջեւում։

ABC News Project 538․ Հարիսը առջեւում է 48%, Թրամփն ունի 46.8%։ Օրեր առաջ Հարիսը այս նույն հարցումներով Թրամփից առաջ էր 4%-ով։

270towin․ Հարիսը 1.2%-ով առաջ է Թրամփից։

RealClearPolling․ Թրամփն առաջ է անցել Հարիսից 0.3%-ով։

Kalshi․ համարվում է ամերիկյան ամենամեծ հեղինակավոր կանխատեսման հարթակներից, որտեղ Թրամփի շանսերն այսօր 64%-ից նվազել են 55%-ի։ Թվերը ժամ առ ժամ փոխվում են՝ ոչ հօգուտ Թրամփի։

Ալան Լիխտման․ 77-ամյա պատմության այս պրոֆեսորը, որին անվանում են կանխատեսումների պրոֆեսոր, շուրջ 40 տարի ճիշտ է կանխատեսել ամերիկյան ընտրությունների ելքը։ ԱՄՆ վերջին 10 ընտրություններից 9-ի դեպքում նրա կանխատեսումներն իրականացել են։ Բացառություն է եղել միայն 2000 թվականը, որտեղ Բուշը հաղթեց դեմոկրատ Գորին։ Նա պնդում է, որ հաղթանակը Հարիսինն է։ Ի դեպ՝ այս մարդը ոչ էզոթերիկ է, ոչ աստղաբան, ոչ բախտագուշակ, պարզապես 13 ֆակտորներից բաղկացած մոդել է մտածել, որն էլ օգնում է նրան կանխատեսել ընտրության ելքը։